Sabato, 18 Novembre 2017
Unitelsardegna Logo
Piattaforma didattica >>
 

Traduzione a cura del Prof. Francesco Casula

Pubblicazione: 
Lunedì, 10 Giugno, 2013 - 09:59

 

L’intervento del Consigliere regionale Efisio Arbau sul “Progetto Eleonora” della Saras.*

Proite semus contrarios a su “Progetu Lionora”:
pro tres resones fundamentales chi ant giai postu in craru sos tzitadinos, sos massajos, sos pastores ma puru calechisiat pessone chi bivit in su territoriu interessadu dae su Progetu de sa Saras.

1) Pro s’Ambiente:
s’area de pertusadura intrat in sa zona proteta de s’Istagnu de S’Ena Arrubia, amparada dae Acordos internatzionales. Unu tretu riconnotu a livellu europeu intre sos prus interessantes pro s’amparu de s’avifauna e de sa biodiversidade.S’arriscu printzipale a livellu ambientale in prus de sa compromissione de s’area de s’Ena Arrubia est s’impestadura de sas tizas de s’abba e s’impestadura de sos terrinos.

2) Pro sa populatzione:
Sas primas domos sunt acante a su Putzu Lionora, sunt distantes addizu batorghentos metros.
No esistint impiantos de pertusadura chi si potant definire a arriscu zero. In sas chidas coladas amus ischidu chi un’ispiatzu pro bogare su gas de propriedade de sa Total in su Mare de su Nord est iscopiadu. Ma s’arriscu printzipale pro sa salude de sos omines est sa possibilidade chi essat a foras s’idrogenu solforadu, unu gas meda meda tossicu che s’agatat semper in intro de sas isterridas de sos idrocarburos.
A custu tocat de azunghere sas emissiones fitianas in s’atmosfera pro s’atividade de s’estratzione:

• idrocarburos incombustos: 2,6 kg;
• monossidu de carboniu: 26 kg;
• ossidos de azoto: 325 kg;
• biossidu de sulfaru: 45 kg;
• particolatu (PTS): 8, 45 jg
(Fonte: Studio Preliminare Ambientale Saras s.p.a)

3) Pro s’Economia:
Possibiles dannos a s’ambiente diant ferrere automaticamente s’economia de Arborea, chi dae semper si fundat subra s’agricoltura e s’allevamentu. Puru una impestadura minoredda de sas tizas de s’abba diat cumpromitere  in manera irreparabile s’istabilidade de su sitema economicu nostru bochinde mizas e mizas de familias.
S’economia de Arborea oramai dae otanta annos si basat subra s’agricoltura e s’allevamentu de calidade. In Arborea tenet sa sede sa Cooperativa produtores Agricolos e sa Cooperativa Late Arborea chi produit su 98% de su late sardu de vaca, chi trisinat prus a mancu dughentas aziendas pro unu totale de trinta miza pecos de boes. S’installatzione de unu putzu pro bogare idrocarburos andat de su totu contra a s’istoria e a s’economia de nois etotu comente sardos.
Credimus chi sas detzisiones prus mannas chi interessant su Territoriu depant essere pigadas dae su territoriu comente dae chi in issu bivit, traballat sa terra, dae chie at ipotecadu su propriu tempus benidore e mescamente cussu de sas generatziones chi ant a bennere.
Dae s’ascurtu naschit su cunfrontu, nessi pro sas detzisiones alternativas a sa chirca de su metanu comente la previdit su “Progetu Lionora” de sa Saras.
In relatzione a sas osservatziones imbiadas a sa Regione pro sa pregunta de valutatzione de attumbidu ambientale, su Comitadu de sos tzitadinos at pessadu chi esseret doverosu de narrere cosas de importu mannu. Su matessi comitadu sutalineat comente esaminende s’Istudiu Preliminare ambientale pro sa realizatzione de su Progetu Lionora 01 Dir- a pag.16:”Su situ no resultat in intro de niuna area de amparu”. Su situ s’agatat acante de unu situ de Interesse Comunitariu (ITB030016 Istagnu de S’Ena Arrubia e territorios lacanas a pari) e de una Zona de Protetzione Ispetziale (ITB034001 Istagnu de S’Ena Arrubia) segundu sas Diretivas Habitat e Puzones). Su Comune de Arborea etotu in su pianu de gestione de su pSIC “Istagnu de S’Ena Arrubia e territorios  lacanas a pari” l’inditat comente area sutaposta a amparu. Sa matessi area est amparada dae sa Conventzione de Ramsar.
A pag. 65: “Cunsiderende sa tipologia de Progetu e  sos efetos subra custa componente sos atumbos subra sa Salude Publica no sunt cunsiderados de importu mannu e duncas no sunt tratados in sa sighida de custa relata”. No si podet atzetare su fatu chi sos atumbos subra sa salude publica no intrent in sas valutatziones de cust’istudiu. In intro de s’area manna bivint  prus a mancu tres miza de pessones e bi sunt prus de chentu aziendas agricolas e de allevamentu.
A pag. 120, Tabella 4.16 “In s’area manna si dat duncas a sa componente de su paisagiu unu balore mediu-bassu”. Giudissiu chi desviat de su totu. No est possibile dare unu balore mediu-bassu a un’area ue bi sunt duos Sic, una ZPS e unu IBA. In intro de s’area bi sunt medas istruturas de sa tzitadina de Arborea, riconnota comente tzitade de fondazione, amparadas dae PPR in su Repertoriu de su mosaicu de sos benes de su paesagiu e identitarios.
Subsidentzia: no bi sunt istudios subra sa possibilidade de subsidentzia comente cosseguentzia de sa bogadura de gas naturale, fenomenu irreversibile chi s’est giai verificadu in casus similis in medas zonas de s’Italia (es. costera adriatica-emiliana-romagnola). Si pedit un’istudiu pro verificare si sa subsidentzia potat cumportare un’arriscu pro s’ecuilibriu de sos contributos idricos a s’istagnu.
A sa lughe de sos fatos creimus chi bi siat s’obligu chi a detzidere siat su terrioriu
In intro de s’area manna bivint  prus a mancu tres miza de pessones e bi sunt prus de chentu aziendas agricolas e de allevamentu.
B’est s’obligu chi siat unu Referendum Populare a decretare si si depet realizare su Progetu Lionora e sas pertusaduras e comente si depet realizare.

(La traduzione in Lingua sarda è del Professore Francesco Casula)