Sabato, 18 Novembre 2017
Unitelsardegna Logo
Piattaforma didattica >>
 

Forru. Custu domìnigu su 12 de maju

Pubblicazione: 
Venerdì, 10 Maggio, 2013 - 12:06

 

 

Su Comunu de Forru, Antichi Cammini e sa Pro Loco de Forru tenint su prexu de si cumbidai a “BIAS IN COLLINAS, ARTI E MESTIERI E VIE SUL BASALTO”.

-PROGRAMA-

Mangianu:

- De is 9 oras BESSIDA PO MANNUS E PITICUS, scoberendi is particularidadis de is matas e de su bestiòàmini de is prus logus stravanaus de Forru, che a Pranu Mannu, Monti Fortuna e su padenti sagru de Santa Maria Angiàrgia.

- Mori po is pipius: FACI A SU PADENTI MAXIOSU

Longària: 2,5 km

Dificultadi: fàtzili

Tempus chi nci bolit po ddu fai: unus 2 oras (cun su pàsiu po murzai)

Pendèntzia: pagu e nudda

Ita serbit: bistiris còmodus, botinus de trekking, àcua, murzu

Su mori no est traballosu, est bonu po is pipius, ca strumbullat is sentidus insoru de su fragu e de is ogus: faendi custu mori maxiosu in beranu is coloris e is fragus s’ant a sartai apitzus, eus a biri su birdi scuriosu de is montis e su birdi biu de s’erba, su grogu de su trigu e s’arbu-arrosa de su frori de sa mata de sa mìndula.

Po su chi spetat is bessidas po is mannus, nci ant a essi duus moris.

- Mori 1: IS GIGANTIS DE SU BASALTU

Longària: 5 km

Dificultadi: mesana

Tempus chi nci bolit po ddu fai: unas 2 oras (cun is pàsius)

Artziada: 100 m

Ita serbit: bistiris còmodus, botinus de trekking, àcua, murzus

Su mori s’at a portai faci a sa parti de pitzus de is artipranus de Pranu Piciu e de Pranu Mannu, chi parint ìsulas de arrocas in d-unu mari de cucureddus. Sa prus cosa spantosa de custu mori funt is arrogus de pedra de basaltu chi fait a biri in totu su mori, su Nuraxi de S’Orcu e una gruta, anca faint su niu storis, tzrepedderis e aici nendi.

- Mori 2: MONTI FORTUNA

Longària: 7 km

Dificultadi: mesana-arta

Tempus chi nci bolit po ddu fai: unas 3 oras (cun is pàsius)

Artziada: 150 m

Ita serbit: bistiris còmodus, botinus de trekking, àcua, murzus

Est unu mori bellu meda chi at a lompi a su pitzu de su Monti Fortuna, totu grutas e grutixeddas anca, in s’antigòriu, is pastoris si cuant candu proiat.

- A s’acabu de is bessidas LABORATÒRIU APITZU DE TORRAI A IMPERAI SA COSA “RI-CREATIVO” PO MANNUS E PITICUS.

- A is 13.oo PRÀNGIU cun cosa tìpica de su logu.

Meigama:

-De is 15.00 PARADAS DE ARTISANAU E COSA DE PAPAI.

- AMOSTA FOTOGRÀFICA apitzu de sa naturalesa sarda.

- ESIBITZIONI DE S’ACRÒBATA VIRGINIA VIVIANO.

-projetzioni de su DOCUMENTÀRIU “semus fortes”.

- APERITIVU A INDONU, ascurtendi sa mùsica de sa truma TAKOMA.

Atividadis e spetàculus funt a indonu.

Po chistionis de s’aparìciu de sa cosa, is bessidas e is laboratòrius bolint prenotaus.

Po su pràngiu tocat a si prenotai e su prètziu est pagu cosa, 8 èurus sceti.

Is bessidas ddas faint GAE assentadas comenti est arrègula a s’Arregistru de s’Arregioni de Sardìnnia.

PO NDI SCIRI DE PRUS E SI PRENOTAI A IS BESSIDAS, LABORATÒRIUS e/o PRÀNGIU:

- IS CHI NO BIVINT IN FORRU: mail a info@antichicammini.it o cell.3384873175;

- GENTI CHI BIVINT IN FORRU: intendei a Arzedi Salvatore o baxei a “Il Bazar” de Garau Gabriella, cell.3479200754.

 

Fonte

Aici est chi tocat a fai is

Aici est chi tocat a fai is comunicaus: bilìnguas. Bravu s'operadori chi ddu at furriau in sardu. Imoi tocat a pensai a is manifestus in paperi...