Po sa sighia: ligei e spantaisia.
 

Ti dha dongu deu sa bòcia ca bòcit.
 

Apu lìgiu custu lìbburu passillendi in s’oru de mari a Mràxini arrùbiu, a càrigas obertas po m’asuspiai beni su nuscu de su mari de amengianu chitzi. Ma no podemu scarèsciri su pòburu mari trulu e tristu de Cabuderra, de Sarrocu e de cudhus bixinaus.
No eus ancora scramentau de su giogu de su palloni. Est sa segunda borta in s’istòria de custu sportu ca s’anti cullionau: sa de primu borta cun su scudetu de su Castedhu, in su 1969/70 e deu femu casi sèmpiri a “s’Ampsìcura”, scudetu pompau cun e de is giorronnallis de is pretrolleris, chi si ndi furant is siendas, in Poltudorra e Machiaredhu, amanniendisia in totu sa Sardìnnia fintzas a lompi a Otzana e Sarrocu. Ma no est srebiu a nudha ca in Ipànnia, cumenti si contat custu lìbburu, Moratti cun s’Inter est arrennèsciu a nci at portai a biri sa partida fintzas unus cantu de trabballadoris de sa Saras in pari a sindacallistas etotu.
Corrudus e apaliaus aici narat su dìciu. Ma ligeisia custu lìbburu totu in d-unu sùspidu, ca no si nc’est de si stentai meda meda, e bieis ca ndi bessint a pillu àterus imprendidoris capitalistas, e funti medas, unu pagus trunfarderis e chi giogant a palloni cun su dinai de totu nosu.

Pàgini 158.

In su celu de Sarrocu:
“Sa Saras at scapiau 6 millionis de tonelladas de anidridi crabonaxa,
1330 tonelladas de òssidu de crabonaxu,
4150 tonelladas de òssidu de asotu,
7390 tonelladas de anidridi tzrufurosa,
1740 chillus de nikelu,
25 chillus de arsènigu,
372 chillus de gromu,
17 tonelladas de binzeni,
16 chillus de càdimu,
223 tonelladas de PM10., est a narri su partìgulau fini. Si fuedhat de bruvuras cun arrullonis de mannàrias asuta de 10 micron(s’unu centesimu de millimetru), e po custu arrespiràbbilis. Si suspint chentza de si nd’acatai, e is arrullonedhus prus piticus bandant a s’arrimai deretus in is prumonis”.
Tantis pigaus de: “European Polluant and Transfer Register”, annu 2007.
 
Pàgini 193.
“De custu est afartada sa crassi dirigenti in su mericedhu de su 26 de Màju(sa dia de is tres mortus in s’arrafineria), che totu is àtaras dias: de frimai is arrancus de su tempus passau. Unu de is pistighinzus prus mannus de su capitalismu coluniali: godangiai tempus e acuai su passau intamis de progetai su benidori”.
 
Pàgini 136.
“Bandat de sei ca su graiori de is tres trabballadoris sardus in su mercau de is noas est cudhu chi est. Fessint stètius disterraus, sa noa fiat stètia prus spedhiosa, prus guvernàbbili, ndi podiat fintzas bessiri unu cumbidu in dunu «talk show» in primu meria. Ma is sardus....………
Sa Cgil, costumat a ndi bogai cumunicaus de prenta fintzas po si fàiri sciri de s’atòbiu de su «leader» cosa sua a su progamu de tellebisioni “Ballarò” no smusciat.
Est totu sa Cgil natzionalli chi no smùsciat: no unu cumunicau, unu tellegamu, unu mesu fuedhu po is tres mortus de Sarrocu. In custu citiri si ligit totu sa debbilesa de su sindicau itallianu”.
 
Pàgini 201.
Tres dias ainnantis primu de s’acuntèssiu, in su mericedhu de Sàbudu 23 de Màju, unu trabballadori meda spertu de sa Saras est brintau in su giassu de “Scida Sarrocu” po pistai is lìteras, cun s’arràbiu craru e cun is fitianas allobas in prus, ca funti s’arretronu de is sentidus de is sardus, sa chèscia de issu etotu.
 
Pàgini 203.
“Apustis de èssiri brintada in sa Bussa[2006] eus bistu s’atrivimentu smasciai po sa siguresa a is tantis su de godàngiu”.
Fuedhus de unu trabbaladori de sa Saras e dellegau de su sindicau.
 
Pàgini 210.
“Po dònnia francu de stipèndiu lìmpiu lassau in Sardìnnia, is Moratti ndi pinnigant tres de godàngiu a Milanu. E is salarxus ca pigant is trabballadoris po mori de is Moratti funti sa de tres partis de su tanti de stipèndius ca s’Inter pagat a is giogadoris cosa sua”.
 
Pàgini 235.
Gràtzias a is sorris de mei Arroberta e Anna e a is fradis de mei Gabrieli e Càralu: is pàginis innui si cumprendit ca sa Sardìnnia est domu nosta dhas eus scritas in paris. E gràtzias, po acabbai e pruschetotu, a babbu nàsciu cuntinentalli e diventau sardu.
 

francudefabiis